Archive

Archive for the ‘வாய்மையான வாக்குறுதி!’ Category

வாய்மையான வாக்குறுதி! – மு.அ. அபுல்அமீன் நாகூர்


p6

வழங்கும் வாக்குறுதியை வகையாய் முடித்துக் கொடுக்க முடியும் என்ற உறுதி இருந்தால்தான் வாக்குறுதி கொடுக்க வேண்டும். இல்லாதது என்றறிந்தும், முயன்றாலும் முடியாது என்று தெரிந்தும் வாக்குறுதி கொடுப்பது வாய்மையன்று. வாக்கு துரோகம், நயவஞ்சகம்.

சத்தியம் செய்து வாக்குறுதி வழங்க வேண்டிய அவசியம் ஏற்பட்டால் அல்லாஹ்வின் மீதே சத்தியம் செய்ய வேண்டும். வேறு எவர் மீதும் எப்பொருளின் மீதும் சத்தியம் செய்தல் கூடாது. பிறவற்றின் மீது செய்யும் சத்தியத்தில் உண்மையும் உறுதியும் இருக்காது.

நபிகள் நாயகம் (ஸல்) அவர்கள் ஒருமுறை வாகனத்தில் செல்லும்போது ஹழ்ரத் உமர்(ரலி) அவர்கள், அவர்களின் தந்தையின் மீது சத்தியம் செய்வதைப் பார்த்தார்கள். உடனே நபிகளார் அவர்கள்

“”உங்கள் தந்தையின் மீது நீங்கள் சத்தியம் செய்வதை அல்லாஹ் கண்டிப்பாக விலக்கியுள்ளான். சத்தியம் செய்கிறவர் அல்லாஹ்வின் மீது சத்தியம் செய்ய வேண்டும். அல்லது மௌனமாக இருந்துவிட வேண்டும்” என்று கண்டிப்புடன் கூறியதை ஹழ்ரத் அப்துல்லாஹ் பின் உமர் (ரலி) அறிவிப்பது புகாரி 6108ல் காணப்படுகிறது.

சத்தியம் செய்த பின் அந்த சத்தியத்தை இதய சுத்தியோடு சுத்தமாக நிறைவேற்ற வேண்டும்.

இக்காலத்தில் கூட்டங்களில் கூவி முழக்கப்படும் சத்தியங்கள், அறிக்கைகளில் பொறித்திடும் சத்தியங்கள், உடன்படிக்கைகளில் உறுதி செய்யப்பட்ட சத்தியங்கள் முறிக்கப்படுவதை, திரிக்கப்படுவதை தினமும் பார்க்கிறோம். கேட்கிறோம்; படிக்கிறோம். இன்று ஒரு இணைப்பு, நாளை ஒரு முறிப்பு, இன்று ஒரு கூட்டணி, நாளை ஒரு மாற்றணி, அதற்கேற்ற கொள்கை மாற்ற கோமாளித் தனங்கள், நேற்று சொன்னதை இன்று மறுப்பது, இன்று சொன்னதை நாளை மாற்றுவது என்ற நாடகங்கள் வாடிக்கையாகிவிட்டது. வேடிக்கையாகிவிட்டது.

Hஇதனைக் குர்ஆனின் 16-92 வது வசனம் “”ஒருத்தியைப் போல் நீங்களும் ஆகி விடாதீர்கள். அவள் உறுதியாக தான் நூற்ற நூலைத் துண்டு துண்டாக முறித்து விடுகிறாள். ஒரு கூட்டத்தினரைவிட மற்றொரு கூட்டம் மிக்க வளர்ச்சியுற்று இருப்பதற்காக உங்களுக்கிடையில் உங்களுடைய சத்தியத்தைத் தந்திரப் பொருளாக ஆக்குகின்றீர்கள். இதனைக் கொண்டு அல்லாஹ் உங்களை நிச்சயம் சோதிப்பான். நீங்கள் எதில் வேற்றுமைப்பட்டுக் கொண்டிருந்தீர்களோ அதனை மறுமை நாளில் அவன் நிச்சயமாக உங்களுக்கு விளக்கிக் கண்டிப்பான்“” என்று எச்சரிக்கிறது.

இந்த வசனத்தில் கூறப்படும் ஒருத்தி முன்னொரு காலத்தில் அரபு நாட்டில் குறைஷி குலத்தில் வாழ்ந்த ரப்தா பின்து அம்ரு. அவள் மூடப்பெண். சந்தேகங்களின் சொந்தக்காரி.

அவள் ஒவ்வொரு நாளும் ஒரு முழ நீளம், ஒரு விரல் கனம் உடைய உரோமம், கம்பளி முதலிய பொருட்களில் கயிறு திரிப்பாள்.

p5அவளுடைய வேலைக்காரிகளையும் அவ்வாறே திரிக்கச் சொல்வாள். காலையிலிருந்து நண்பகல் வரை இவ்வேலை நடக்கும். பிற்பகலில் திரித்த அத்தனை கயிறுகளையும் அவளும் பிரித்து முறித்து வேலைக்காரர்களையும் அவ்வாறே செய்யச் சொல்வாள். சத்தியத்தை முறிப்போரை வாக்குறுதி மாறுவோரை எடுத்துக்காட்டுடன் எடுத்துரைக்கும் வசனம் இது.

“”நீங்கள் உள்ள உறுதியுடன் செய்யும் சத்தியங்ளை நிறைவேற்றவில்லை எனில் அல்லா உங்களைக் குற்றம் பிடிப்பான்“”‘ என்ற திருக்குர்ஆனின் 2-225வது வசனப்படி நிதானித்து, நிறைவேற்ற முடியும் என்பதை நிச்சயப்படுத்திக் கொடுத்த வாக்குறுதியைக் குறைவின்றி நிறைவேற்றுவோம். இறைவனின் அருளைப் பெறுவோம்.

நன்றி:- தினமணி 02 Nov 2012 வெள்ளிமணி

நன்றி:- மு.அ. அபுல் அமீன் நாகூர். அஞ்சலக அதிகாரி(ஓய்வு), செல்பேசி:-00919943469691

தலைவர்:- ‍பெற்றோர் ஆசிரியர் கழகம் நாகூர், கௌதிய்யா துவக்கப்பள்ளி நாகூர், கிராம கல்விக்குழு நாகப்பட்டினம்.

துணைதலைவர்:- மத்தியஅரசு ஓய்வூதியர் சங்கம் நாகப்பட்டினம், ஜாமியா மஸ்ஜித் செய்யது பள்ளி நாகூர்.

பொருளர்:- நாகூர் தமிழ் சங்கம் நாகூர்.

உறுப்பின‌ர்:‍‍‍‍‍‍- த‌மிழ்நாடு நுக‌ர்வோர் இய‌க்க‌ம்.

%d bloggers like this: